Monsablogg

Hæ hæ
Tíminn líður hratt, við vorum svo heppin að fá hringingu frá dagmömmunum á Ólátagarði í síðustu viku, þannig að Ríkarður Flóki er núna í aðlögun þar og við þurfum ekkert að stressa okkur á því hvort hann komist til dagmömmu lengur. Honum líður alveg svakalega vel, enda aðstaðan til fyrirmyndar og Elva og Erla eru yndislegar. Veit ekki hvað hinum börnunum finnst um hann, en það var ein stelpa í gær með gosbrunn í hárinu sem Ríkarði fannst rosa flottur og togaði í hann við hvert tækifæri, hún er kannski ekki eins hrifin af því að fá hann, hver veit:D:D
Svo er ég að fara að vinna á mánudaginn. Skrýtið að fara bara aftur í vinnuna sí sona eftir að hafa verið heima í 10 mánuði, en náttúrulega líka spennandi og gaman, svona fyrir mig amk. efast um að Sigga verði ánægð þegar hún fattar að ég man ekkert hvað ég á að gera í vinnunni og hún verður að kenna mér það allt aftur:D

Hæ hæ

Fann mína innri Nigellu og bakaði eins og vindurinn um helgina, hélt svo kaffiboð í gær fyrir fjölskylduna. Næstum allir veikir þannig að ég held að það hafi barasta verið meira af kökum í afganga en voru í boði í gær. En ég á góðar vinkonur og þær redduðu þessu í kvöld. Samt ennþá til afgangar ef einhver vill kíkja á morgun;-þ

Vek athygli ykkar á því að myndir af honum Ríkarði hafa verið settar hingað.

.. við erum ekki hætt að blogga, bara svoldið langt milli færslna hjá okkur. Í dag er merkur dagur því að:
a) Ríkarður mældist 8kg og 70 cm og var bólusettur í annað sinn fyrir einhverjum óþverra.
b) Ríkarður skipti um bleyjustærð, er nú kominn í stærð 4 (sem ku vera midi stærð)
c) Ríkarður borðaði gulrótarmauk og drakk vatn í fyrsta skipti.
d) Ég setti upp einfalda stærðfræðiþraut til þess að verjast ágangi rússneskra ruslpóstsforrita sem benda mér á dótabúðir á netinu fyrir kynhverfa með bleyjublæti (nei ég skoðaði þetta ekki, þetta stóð í hlekknum).

… en bara man ekkert hvað ég hef gert, svona svoldið eins og með öll matarboðin í síðustu færslu… man nú samt alveg eftir afmælinu sem ég fór í í gær. Hún Pia átti afmæli og við fengum dýrindis kræsingar til að jamla á í sólinni á svölunum hjá henni, hef örugglega sagt öllum sem lesa þetta blogg oft og mörgum sinnum hvað það er gaman að komast í veislu hjá Piu, það er alltaf eitthvað öðruvísi og spennandi á boðstólum og alltaf svakalega ferskt og braðgott. Líka í gær, nammi namm. Svakalega góð súkkulaðikaka, brauð og álegg og fleira fínerí mmmm brómber!
Við mamma, Ríkarður og Jón Þór fórum í búðarráp í gær, mamma gaf flókanum tripp trapp stól og ég keypti pelahitara fyrir ferðalagið í næstu viku og eitthvað fleira, man ekki alveg hvað það var. Man samt að við fengum ís.
Og já döh! við Bjarki fórum í bíó um helgina og Valla og Elvar komu og pössuðu, sjitt hvað heilinn á mér er eitthvað gatasigtalegur þessa dagana. DIE HARD 4. Vííí hvað ég hafði gaman að henni. Ógeðslega fyndið í lokin þegar búið var að drepa alla vondu kallana (nei þetta er ekki spoiler, vondu karlarnir drepast alltaf í lokin á svona myndum), skaðinn af heimsyfirráðatilburðum vondukallana var svo ótrúlega mikill (ég meina ef það kostar skrilljón trilljón að gera eina sundabraut og tekur 10 ár eða eitthvað álíka, þá eiga næstu 10 ár í Die hard heimi eftir að verða ansi pirrandi) og það var enginn að pæla í því, allt var komið í lag vondu karlarnir voru dauðir! Vííí…
Ríkarður fór líka á kaffihúsí fyrsta sinn á laugardaginn, Vegamót og fannst þetta ekkert smá spennandi. Þá vitum við hvar hann verður eftir 15-20 ár… ég var aftur á móti við það að fá í bakið ég var svo stressuð að sólin myndi skína á hann og sat því í mjög skrítinni stellingu að puða við að búa til skugga á hann.
Laugardagur var semsagt dagur nýrra upplifanna hjá Flóka, kaffihús, amma og afi að passa hann um miðja nótt og svo fór hann líka í strætó í fyrsta sinn og í húsdýragarðinn í fyrsta sinn, en þar sem hann er bara 3 mánaða veit ég ekki alveg hvort það sé hægt að segja að hann hafi upplifað þetta eitthvað… og svo náttúrulega var hann steinsofandi í strætónum.

Ekki slæm upprifjun hjá gatasigtisgellunni, svona ef við hugsum ekkert út í það að ég man semsagt bara eftir 2 dögum…

Það hefur gengið svolítið brösulega að sóla sig og sinna Ríkarði Flóka sómasamlega líka, þar sem honum finnst allt of bjart úti þrátt fyrir að “fá” bara að vera í skugganum en ég reyndi að redda mér með því að kaupa á hann græn sólgleraugu, hann er úberkrútt með þau! Auðvitað finnst honum mest spennandi að taka þau af sér, en þar sem hann er bara þriggja mánaða gengur það ekki neitt sérstaklega vel. Við höfum semsagt verið einu númeri of miklir innipúkar síðustu tvær vikur fyrir minn smekk og einu númeri of mikið úti í hitanum að hans mati.
Ég hef bætt mér þetta upp með því að telja mér trú um að mér finnist gaman að vera inni í góðu veðri og það gengur misvel. Gékk best á föstudaginn þegar ég tók mig til og bakaði eða eldaði úr öllu hráefninu sem var til í eldhúsinu, svo var of gott veður til að fara í búð um helgina þannig að við gátum eingöngu borðað hrökkbrauð með smjöri og drukkið vatn þar til á mánudaginn, sem var allt í lagi mín vegna.
Annars nýtti ég síðustu sólina í dag til að fara í IKEA. Ég er alltaf svo bjartsýn, hélt að nýji IKEA Stockholm leðursófinn sem ég girnist (tvö stykki takk fyrir) og nýja ferhyrnda IKEA Stockholm sófaborðið yrðu á útsölu. Bjarki, var í raunsæi sínu búinn að vara mig við, þannig að ég fór ekkert að gráta. Huggaði mig bara við það að tveir IKEA sófar og sófaborð eru samt ódýrari en einn sófi í Seating Concept, þannig að í raun og veru væri ég að spara….
…. á bara eftir að sannfæra Bjarka…..

Hérna er Rikki sæti uppáhalds flókinn okkar og Ríkarður með Thelmu Rán uppáhaldsfrænku sinni.

Daginn. Síðasta vika var heldur en ekki viðburðarík, Bjarki kominn í smá sumarfrí, Bróðir og bróðurdóttir hans eru á landinu og heimsóknir og stúss eftir því. Það var því kærkomið frí í dag hjá okkur Flóka, en Bjarki ákvað að skreppa norður í Skagafjörð með familíunni að labba á Mælifell. Þegar komið var í húnavatnssýslu var svo þoka og leiðindaveður þannig að þau brunuðu yfir kjöl í staðinn…. voru komin eitthvað áleiðis þegar þau sáu hnjúkinn og engin þoka yfir honum, bömmer.
Ég vann smá þrekvirki þegar ég sniglaðist upp Úlfarsfell á fimmtudaginn með strákunum, Valla passaði Ríkarð á meðan. Fór svo í kvennaröltið í gær, reyndi aðeins að skokka, en fékk verk í mjóbakið vonandi bara smá relaxín ennþá í kerfinu en ekkert vesen, er nefnilega farin að hlakka til að skokka aftur, fæ fiðring í magann við tilhugsunina.
Jæja, farin að sofa áður en baugarnir taka yfir allt andlitið.

hehehehehehe, nei ég er ekki hlutdræg (*ENGILL*). Bræðarinn er á fullu að bræða mig og aðra þessa dagana, hann hló í fyrsta skiptið svona í alvörunni (keppnis) á miðvikudaginn í leikfimi, fannst ég frekar hlægileg að nota hann sem lóð í leikfiminni (vantaði bara: þú hlýtur nú að geta lyft einhverju þyngra…;)) Bjarki er náttúrlega abbó því hann hefur ekki heyrt þennan fína hlátur, því alveg sama hvað við beyglum okkur og fettum (og við erum sko mikið búin að beygla okkur og fetta síðan á miðvikudag) þá kemur ekki boffs upp úr honum, bara svona “sénsinn að ég hlægi að þessu” bros - - hann er sko alltaf sami stríðnispúkinn.

Svo á laugardaginn fó hann að skoða aðeins á sér hendurnar, fannst þær þetta líka svaka fínar þannig að í gær greip hann í dót sem var hliðina á honum og svo aftur í dag - - - úf hvað mér finnst hann mikill snillingur (ég keypti sko handa honum þetta svaka fína dót á fimmtudaginn þannig að mér finnst ég eiga einhvern þátt í þessu þroskastökki - - - - sénsinn;))

Annars bara sorrý Sigga, er alltaf á leiðinni en kemst ekki í þessari viku, held ég, er búin að lofa múttu að passa brósa þangað til þau fara í sumarfrí þar sem skólanum er að ljúka hjá honum og Dagný vinkona er að kíkja í heimsókn og ég er alltaf að reyna að komast í leikfimi (sváfum yfir okkur í hádegistíma í síðustu viku og núna er búið að leggja þann tíma niður þannig að við þurfum að fara að læra að vakna fyrr á morgnan og svo er 9 vikna skoðun (plííís vertu svaka þungur og pattaralegur) og svo þarf ég víst líka eitthvað að sinna krúsanum, svona ef ég ætla að eina mér heiðurinn af fleiri snillingamómentum alla vegana

og ég held að hann verði bara sætari með degi hverjum! Eitthvað er hann þó þreyttur eftir helgina og vill bara vera í fanginu á okkur, helst sofandi á milli sopa, náði þó að fara með hann í labbitúr í góða veðrinu í dag.
Fór í fyrsta sinn inn í fossvogskirkjugarð um helgina og fannst svo fallegt að ég fór aftur þangað í dag, ég ólst upp á akureyri þannig að ég hef ekki vanist svona flottum kirkjugarði, minnir meira á listigarðinn satt að segja, svo er líka áhugavert að lesa á legsteinana, fann húsfrú frá miðri síðust öld sem er nefnd á undan eiginmanninum meira að segja - venjulega eru kallarnir á undan - sé fyrir mér feita, pattaralega og háværa maddömu með gullhjarta.